DHARMA WECANA

DHARMA WECANA

“SUPUTRA”

Pinih riin tittang ngaturang suksma majeng ring ugra wakia, riantukan titiang kaicen galah pacang matur ring galahe sane becik puniki. Utamane majeng ring para yowana, para diaksa, para Jana sane sampun prasida rauh ring rahina puniki sane gumanti singgihang titiang.

Om Swastyastu

Maka purwakaning atur titiang, lugrayang titiang pacang ngaturang angayubagia saha ngaturang pangastuti majeng ring Ida Hyang Parama Wisesa riantukan wit sangkaning Ida sane setata ngicenin karahayuan mawastu titiang prasida ngiring sameton sareng sami pada kenak tur mapupul ring genahe puniki.

Inggih ida dane sane wangiang titiang, rikanjekan sane mangkin titiang pacang matur nganinin indik "SUPUTRA". Janten ida dane pawikan mungguing teges kruna inucap. Inggih punika "su" mateges becik, "putra" mateges oka, pianak. utawi putra. Dadosne sane kabawos suputra inggih punika putra sane becik utawi luwih.

Inggih ida dane sareng sami sane wangiang titiang manut teges krunane iwawu suputra wantah putra sane mautama tur prasida ngawe kasukan ring kulawarga. Duaning asapunika janten ring sajeroning ngawerdiang putra sane suputra mangdane prasida ngalaksanayang pabratan manut daging kecap sastra agamane. Riantukan wenten kabawos kalintang meweh miara yen imbayang kadi ngawangun, bilih-bilih pacang ngawerdiang putra suputra. Risampun patemon kama bang lan kama petak dados manik ring sajeroning garba, pinaka bibit suputra puniki mangdane kapiara sane becik, ajeng-ajengan mangda cukup gizi, manut kadi dresta sang laki utawi sang lanang patut ngalaksanayang brata inggih punika : nenten nyukur rambut, nenten ngambekang kroda mangdane setata mapauruk sastra agama minakadi : kakawin miwah kidung anggen nuntun ring sajeroning nyujur kadegdegan kayun. Sakala miwah niskala kalaksanayang riantukan pacang ngawisesa utawi mapikenoh marep ring jabang bayi utawi manik ring sajeroning garba.

Inggih ida dane sareng sami sane wangiang titiang, kepagehan makta angga lan pikayun sang laki janten kauji rikalaning sang istri utawi rabi ngidam. Duaning kadi punika sane lanang mangda yakti-yakti sabar saha nenten dados wirosa ring anak istri. Dados irika sampun kabuktiang, kecihnayang mungguing suksman upacara pabyakalan lan pawiwahan. Minakadi ngaranjingin benang sane kaiketang ring carang dapdape tur mategen-tegenan miwah madagang-dagangan. Suksman ipun gumanti sampun sayaga nikul abot dangane, suka miwah dukane ring sajeroning nintenin Grehasta Asrama.

Ida dane sane wangiang titiang, risampune welu ngeraris yusa ngantos yowana punika wantah amonaan yata tanggung jawab I Rerama. Sekadi napi sane kaunggahang ring Sarasamtiscaya, wantah wenten lalima dados swadarmaning rarama sane kabawos "Panca Wida" Inggih punika :

1.   Maniupadjaya teges ipun nyekolahang pianak mangda ngamolihang kaweruhan.

2.   Matulung urip teges ipun nayubin saking saluwiring pancabaya.

3.   Maweh binojana teges ipun ngewehin ajeng-ajengan, sekadi nasi lan asi.

4.   Singaskara teges ipun kaupacarain ngawit magedong-gedongan ngantos matatah mangdane mrasidayang ngamangguhin karahayuan.

Inggih ida dane kad, punika swadarmaning I Rerama ring sajeroning ngamolihang putra sane suputra. Riantukan wenten kaunggahang ring kakawin Nitisastra inggih punika :

"yon ing putra suputra, sadhu gunawan mamadangi kula wandu wandawa ".

Teges ipun :

Putra sane becik, wicaksana tur wikan prasida ngaledangin kulawargannyane.

Taler ring Slokantara wenten kaunggahang sekadi puniki :

"Kautaman sang magawe yadnya sapisan alah palanya dening wang madue putra suputra sanunggal".

Teges ipun :

Suksman anak sane ngamargiang yadnya sapisan kakaonang ring kautaman anak sane madue putra luwih asiki.

Inggih ida dane sane wangiang titiang, sane mangkin pacang cutetang titiang mungguing napi sane prasida antuk titiang ngaturang ring ida dane sareng sami.

Inggih punika:

1.   Sane kabawos putra suputra inggih punika putra sane luwihing kawigunan mawastu sida pacang ngaledangin kulawargannyane.

2.   Ring sajeroning ngacepang mangdane ngamolihang putra suputra mangda saking tuhu kayunne, babawosan miwah parilaksanane sane manut ring daging sastra agamane tur sida ngalaksanayang pabratan.

3.   Yening sampun sameton sami prasida ngawerdiang putra suputra janten jagate setata pacang sutrepti, degdeg lan landuh. Mawastu tatujon agamane Moksartham Jagadhita Ya Ca Iti Dharma presida pacang kapolihang.

Inggih ida dane sareng sami sane wangiang titiang, wantah kadi punika prasida antuk titiang matur, dumadak-dumadik napi sane unggahang titiang ring ajeng prasida pacang dados tatuladan. Ida dane sareng sami janten ring sajeroning titiang matur, akeh mungguing katunan, titiang ngalungsur, gengrna sinampura. Mogi-mogi ida dane sareng sami polih tapak jnana sang adi luwih, jagat degdeg dirgahayu dirgayusa. Pinaka wasananing atur titiang ngaturang parama sami.

Om Santih, Santih, Santih Om